Últimamente dícenme que toi mui pensativu nestos artículos. Que son tan personales que nun s’entienden bien, por facer referencia a les vidayes más tapecíes de mio o pola medida astracta cola que xuzgo los asocedíos que narro. Igual voi enquivocáu per esta sienda, que too pue ser, per como dicía Horacio (más o menos, qu’agora falo de memoria), escribo pa los mios amigos, y si m’insisten muncho. Precisamente, nel cuadernu de notes atopo unes palabres d’otru clásicu, Aulo Persio Flaco, que dicen: non equidem hoc studeo, pullatis ut mihi nugis / pagina turgescat dare pondus idonea fumo. / secrete loquimur... Pertenecen a la Satira V y la traducción vendría a ser dalgo asina como “dende llueu nun voi dedicame a entrullir les mios páxines de menugencies y bilordios pa da-y un pesu afayadizu al fumu. Tamos falando en priváu...”. Pues eso, que si escribo lo qu’escribo, fáigolo cola cuenta de que-y interesen a los amigos y a otros que nun siéndolo puean llegar a selo si me dexen intentalo.
La verdá ye que los amigos nun sabe ún ónde se puen atopar. Son una
especie rara qu’apruz cuando menos esperes y que resulten un esllumamientu
fondu con independencia de la edá que s’acarrete. Paeciera que’l ser humanu ta
siempre esperando un amigu, otru yo que nun sía’l yo mesmu que nos acompanga
tolos díes. La triba d’amigos que caún escueya o lu escueyan yá ye otra
cuestión estremada. Lo mio, ye xusto y triste reconocelo, son los débiles con
potencial. Préstame la xente que val más de lo que piensa, y préstame velos
trunfar. Lo mesmo na lliteratura que nel cine. Nun pueo evitar sintir
almiración por esos héroes derrotaos de delles noveles, perdedores nobles
qu’acaben ganando cuando yá naide espera por ello. Ye un cariñu patéticu que quiciás
tapeza nicios d’identificación personal, un sentimientu de venganza quixotesca
contra les inxusticies. Nun fai falta munchu esfuerzu p’averase a Ignatius J.
Really con un aldu de tenrura. Los seres desvalíos, inclusive’l más tarrecible
de toos como Ignatius, esconsoñen en mí un instintu absurdu d’amparu. Hai un
desencantu escuru nesi intentu d’acuriosar el mundu a los güeyos del héroe. Na
realidá asocede al contrariu: polo xeneral la enculturación consiste en
somorguiase nel magma social de color buxu qu’aconseya la televisión davezu. La
mediocridá iguálase per baxo y pierde’l so sentíu clásicu de ponderación,
procuru y responsabilidá. El ser humanu busca asina la invisibilidá na masa.
Desapaecemos dende nenos mediante la imitación, queremos ser unu col mundu que
nos arrodia, integranos nun cálter d’homoxeneidá, xuntura y unicidá.
Pola contra, Ignatius mira’l mundu como un fallu ablucante por
evidente, faltu de xeometría y teoloxía, un mundu de necios conxuraos contra
elli. Los personaxes de Kafka nun amuesen esa superioridá intelectual, pero sí
una triste ausencia d’ésitu a la hora d’integrase. Gregor ve incomprensible’l
comportamientu ayenu cuando’l polu personal de sentimientos, pensamientos y
identidá nun camuda dientro d’elli. Esi home aturulláu por una rede
burocrática, que lu emburria al abismu d’una falsa culpabilidá, tamién achisba
con desesperu una realidá que debería entendelu a elli, y non al revés.
La imperfección d’estos personaxes rescampla ante la mesma imperfección
de la vida siempre imperfecta, pero perfecta al empar por ser la única posible.
Apocayá lleí unes palabres de Rafael Argullol que dicíen que’l perdedor
auténticu y ensin reserves fainos algamar la nuestra llibertá máxima. Nes
noveles d’Emmanuel Bove tamién alcontramos esi destín manifiestu y lliberador
na derrota. Los personaxes de Mis amigos, La última noche, La
trampa, La coalición o Corazones y rostros, quieren escapar,
pero nun conocen los códigos o claves qu’espliquen les rellaciones entre
factores sociales y coses, les equivalencies secretes del futuru o les
soluciones qu’hai que resolver nel continuu vivir. Como dicía Ortega, vivir ye
un necesariu decidir y decidise. Vivir consiste en resolver y resolvese
a ún mesmu.
¿Quién nun sintió dacuando que, conociendo les llamuergues d’un camín,
nun ye quien pa escoyer otra sienda, esviar el pasu y probar suerte nel bandu
victoriosu? Como nuna velea, decáteste de la escuridá tres la puerta, pero nun
pues evitar escucar col miéu atarazando les coraes, mientres la gloria espera
no negro. Y la gloria, nun sé por qué, suénate a dalgo sapiego, sangrino,
definitivo.
