Con muncha frecuencia la vida consiste n’esperar, esa suerte
d’hibernación na que dedicamos el tiempu a pensar. Nun sabemos bien qué: si’l
futuru o’l pasáu o’l presente inmediatu. Esperar nun hospital, na estación del
tren, que termine una conferencia o una película. La espera ye una forma de
muerte porque aseméyase a una negación pola activa consecuencia de vivir. Con esto último refiérome a que vivir supón tar y ser nun agora activu, acorrompináu de
continues decisiones, un espaciu de movimientu simbólicu que s’agranda cola
espera pa detenese, pa suspendese al empar. Cuando esperamos nun vivimos el
presente sinón que miramos el final d’esti presente abegosu del que queremos
prescindir cuanto enantes.
En dellos llugares hai sales d’espera, purgatorios onde embolicamos el
nuestru tiempu y qu’Augé definió como non-llugares. Les sales d’espera
diséñense col enfotu d’asitianos na nuestra vida, de facela sólida y real. Pero
atopo un daqué traicionero nesa música ambiental de melodíes suaves y
tristones, neses paredes de cuadros abstractos y lluz indirecta, neses
sielles siempre incómodes y funcionales a mitaes, neses ventanes a la nada, y
neses miraes durmientes de los qu’esperen con ún. Non, la vida nun ye más sólida
nes sales d’espera. Siacasu, pasamos tantu tiempu n’espera (al teléfonu, a la
puerta’l xefe, al pie de la estatua onde quedamos cola pareya...) que lo normal
paez esperar, y la vida son esos rellumos ente los duelgos de la eterna espera.
Solo entós podríamos convencenos de que les sales d’espera faen la vida más
sólida. Escribe Rafael Argullol que, esamináu un fechu con cercanía y procuru,
lo normal nunca esiste, y la Historia, como la nuestra vida, ye un saltadoriu
d’anomalíes, de xiros imprevistos, de contradicciones incomprensibles... Vivir
sería una anomalía y la espera l’estáu natural del ser humanu.
Por embargu, quiero pensar que cualesquier sitiu de pasu pierde’l
carácter de llugar si nun va acompangáu d’un sentíu vital d’utilidá. Nun se
trata d’una utilidá llaboral nin rentable (nun fai falta medir económicamente
tolo que s’acomete), pero sí de tola utilidá que puea predicase de exercer la
vida. Porque vivir pamidea ye un exerciciu, un exercer diariu, continuu,
responsable y consecuente con ún mesmu. Nesi debalar perpetuu la espera apruz
como una torga metanes el camín o, cuando menos, una llamuerga qu’amenorga la
capacidá de movese. L’exerciciu de vivir desapaez na espera convirtiendo la
vida nun alendar ensin consecuencies.
Pa volver la espera dalgo con xacíu, pa enllenala, ocupámonos en lleer,
escuchar la radio o’l MP3, consultar el móvil o la tableta. Buscamos asina una
ventana pa siguir elixendo, optando, viviendo en resume. Dalgún día daréme
cuenta de que tola vida n’amplitú ye una gran espera qu’arredolamos a cada pasu
a la gueta por facer dalgo, lo que sía que dea sentíu a esta anomalía vital
pela qu’arrebollamos de contino, hasta qu’alcontramos el fondu, ellí onde nos
espera Ella, la infinita espera.
