Alcuérdome cuando tuvi la primer cinta de música (regrabable). Depués
vendría’l primer compact disc, dalgo que nun tardando llamaríen CD. Pero agora
quiero deteneme na cinta. Había un simbolismu de gourmet naquelles cintes de
canciones esbillaes con procuru de báramu musical, seleccionando los pexes que
nalaben nes agues radiofóniques y que yo pescaba pa les mis cintes, siempre
sollerte a cortar les palabres cacipleres del llocutor. Porque daquella les emisores
de radiu marcaben la sienda, el destín, les regles del xuegu mercantil de la
conocencia musical. Nun había MTV, nin sobre too, piratéu. Sería inconcebible
entóncenes imaxinar que’l tecláu d’un artefactu apurriera la discografía
completa d’un cantante, toles películes d’un director o tolos llibros de
munchos escritores. Convién decatase de que’l volume d’información sobrepasa
abondo la capacidá (cognitiva, temporal o sensitiva) d’un ser humanu pa
disfrutar de too ello. ¿Cuál ye l’enquiz d’esto?
Cayimos nel caos, nel desorde más absurdu, abiertu, impredecible. Hasta
n’anarquía, davezu venceyada al desorde de forma enquivocada, hasta n’anarquía
dicía, hai un orde, establecíu mediante mecanismos democráticos directos,
igualitarios, de respetu polo ayeno, ensin políticos nin clases, pero orde. Les
normes aprobaes pola ciudadanía d’abaxo p’arriba son normes tamién. Poro,
acuriosen razón o logos nel sofá de la coherencia.
La música necesita armonía y lletra igual qu’un ser humanu precisa
asitiar un llibru nel estante cimeru d’un requexu’l salón. Non toles persones
ordenen igual los sos llibros o los sos discos, pero munchos dirán que’l
desorde nel que viven supón un orde pa ellos. Por embargu, hoi’l coleccionista
de discos, películes o llibros ellectrónicos ye un ser omnímodu, antropófagu,
de picu bastu y sometíu al imperiu totalitariu de la gula virtual. La sociedá
de la información, postsociedá, sociedá líquida o como sía que queramos
llamala, embute a los sos semeyantes nun canibalismu intelectual basáu nel aforoñamientu
de cultura ensin dixestión. Come y nun s’alimenta. Graba y graba megabytes
d’idees que nun aprovecha. Aporfia na acumulación pola acumulación, xuntar
hermanos y primos, races estremaes d’estilos musicales o lliterarios, altures y
baxures, ensin criteriu. Apradiar productos culturales a lo xole (epítome del
consumismu pa probes) ye símbolu d’avance, modernidá, aspectu cool,
sentíu de la presencia nel obligáu cestu de la cotidianiedá. Esti
aturullamientu antróxase de bytes, kilobytes, terabytes... d’alcuerdu coles
regles, o ausencia d’elles, que dicta la web. Muncha xente trema’l discu duru
del ordenador con información a la que nun va acceder enxamás, d’un xeitu
asemeyáu al caóticu baturiciu d’internet, onde’l criteriu dignificador de la
esperiencia, el saber meditáu del estudiu o la conciencia de la personalidá
puesta en presente desapaecen pa dexar pasu a la profecía del númberu, del
incrementu na información accesible (entendío como posible acasu, non como
oportunidá conveniente).
De resultes d’ello, ye como si l’enólogu qu’enantes peñeraba les
etiquetes que vistíen les sos botelles de vinu, colección artística d’arumes,
testures, sabores, pinacoteca d’uva fermentada, agora s’entregara al garrafón
del númberu, del cuantimás meyor, axuntando caldos y entumeciéndolos hasta
dexar un vinu de garrafón. Como fai l’atuñáu, nun se gasten les perres na
felicidá de vivir sinón nel pozu mortuoriu y ermu del simple aforoñe.
Nun voi echar d’internet y los sos méritos (munchos), pero nun me
presta un res qu’esos vezos se treslladen a la vida d’un xeitu que produz
remor. Una vida fecha entós de pequeños detáis, ensin unidá personal. Ye como
si les persones dexáremos de ser la referencia del orde pa ser preseos d’un
estáu superior de consciencia. L’antiguu bibliófilu cuidaba los estantes onde
s’enriestraben los llibros, dibuxando asina’l mapa de papel de la so filosofía,
puntu de vista o historia personal. El llugar dictaba la conclusión. Esta nueva
reducción al detái, al momentu, al númberu, a la lletra minúscula nun ameyora’l
sabor de les coses valioses, anque pequeñes, que puea haber, sinón qu’al
aviesu: fai perder la perspectiva del bosque, y yá nun vemos nin los árboles,
nin la llume que los calez, nin l’aire que sutrume la herba, nin los sentidos
rastrexan deseos o odios, y vuélvese too borrín, nuna realidá encercinada y
aforfugante.
