Nun sé si ye característica propia de los asturianos, pero abonda
davezu na gastronomía del comportamientu humanu un ingrediente de descortesía
qu’esmolez por impertinente, vergonzosu, cafiante y evitable. Les
xeneralizaciones siempre s’enquivoquen porque los humanos nun somos cubos de
metacrilato prefabricaos ni nengún otru componente mecánicu manufacturáu en
serie. Asina que nestes páxines disparo a bultu y el fallu ye tan lóxicu como
necesariu. Al fin y al cabu, el furacu tamién llenda la materia. Nel casu
d’esto qu’escribo agora, tengo atopao muncha cortesía ente belgas y portugueses
y poca n’ingleses y franceses. Polo que me toca más cerca, vengo alvirtiendo
vezos poco cívicos na cola del bancu, na cai al andar pente la xente, na
carretera a bordu un coche o nos pidimientos que recibo nel trabayu. Como si
l’asturianu perdiera hai tiempu esa tradicional filosofía de combayar col otru,
col que comparte mundu, llaceries y azares. Ye un prontu sorpresivu, eventual,
nada vagarientu. Una reacción agresiva y fata na qu’avecen a amosar malos modos
persones de les que nun esperaríes comportamientos asina, bien pol pedigrí de
la edá, bien pol carácter balsámicu y de pachorra naquellos que conozo meyor.
En suma, rebalbia dalquién ensin vinir a cuentu, con un rellumu de
cólera o desatinu inconsciente qu’asocede faltu de xustificación seria que pese
lo suficiente na romana del sentíu común. O emburria pa pasar al vagón del tren
y tovía pon mala cara si-y dices daqué, y ocupa un sitio bien ceo ensin que los
años sirvan de salvoconductu de prioridá o respetu. Fala otru al altu la lleva,
glayando incoherencies y tochures pa criticar un vezu ayén. Y hai una muyer que
insulta al negru que pide unos euros por dalguna caxigalina d’eses que venden
pelos chigres. Nun se trata solo d’un partíu de fútbol nel que l’apasionáu
aficionáu salta resquemosu cola última falta a destiempu del equipu rival, o
que la intelixencia desapaeza por nun arrancar el d’alantre en cuantes que’l
semáforu cambia a verde, sinón tamién de la persona prudente que repostia a
dalquién que se coló por erru y ensin malicia, y los insultos suben d’intensidá
en volumen y baxen de calidá en léxicu. Son especialmente, arriendes de too,
eses miraes d’homicidiu involuntariu qu’espliquen más que callen.
Ya dixi que desapaez la intelixencia, y nesti sen escribía una vuelta
más el mio queríu Montaigne que nun hai pasión que destruya tanto la sinceridá
de los xuicios como la cólera. Paeciera que taba pensando na descortesía y
inritación qu’abarquien últimamente les rellaciones sociales. Y digo sociales
cuando diba dicir humanes. Pámique muncho de lo que nos fai humanos ye la
capacidá de suxetar la ira (pecáu capital yera, y nun sé si seguirá siendo),
pañar les riendes de la sangre propio y domar les faragulles d’animalidá
qu’ainda guardamos no fondo. L’asturianu consigue esti propósitu nes coses
importantes, pero na menugancia de la cortesía déxase llevar pol ríu de la indignación.
Esta ausencia de cortesía que rechina nos mios oyíos cuasi a diariu rescampla’l
valor del diálogu y del sosiegu. Esti enraxonamientu o incivismu d’a pie, esta
animalidá del intre, asonsañen una especie de venganza pa escontra nosotros
mesmos. Averguenza’l pocu esfuerzu de la
xente pa nun encismase a cuenta d’andromines visibles o afrentes invisibles.
¿Será que la naturaleza propia del asturianu asítiase na descortesía, nel
enfrentamientu? Pa Empedocles, la discordia yera la causa del ser de toles coses.
¿Igual esi enfrentamientu ye necesariu pal asturianu, pa ser y sentir, de
manera que l’amor y l’odiu anden n’equilibriu, y predica amor en priváu y odiu
en públicu? Desconozo la respuesta. Diz tamién Montaigne qu’al traviés del
cabréu paécennos más grandes les faltes como los cuerpos al traviés de la
borrina. Asina andamos pel mundu: encercinaos metanes una perpetua falta de
sencia, enfocicaos por nada, escaeciendo l’autoridá de l’armonía como
inevitable opción d’escelencia.
