¿Pa qué sirve la lliteratura?

Tiénenme fecho esta pregunta davezu y de mano escámame la garduña llingüística que tapez trés d’ella. ¿Entrugar pola utilidá de la lliteratura nun supón yá un prexuiciu rentabilista, remunerativu, positivista y posibilista? ¿Quién obliga a la lliteratura o a cualesquier otru arte a sirvir pa dalgo? Preguntar pa qué sirve la lliteratura elide la pregunta más interesante de qué significa la lliteratura. Lleer un libru significa madurar, crecer, abandonar la condición de guah.e (inocente, cordaliegu y faltu de responsabilidaes con ún mesmu). Significa adientrase na rexón desagradecida y imprevisible de la mocedá, inclusive nos años adultos, como si la llectura conxelara’l tiempu y lu moviera, y nos volviera nenos otra vuelta. Un llibru, como’l trescursu de les edaes de la vida, tresforma a una persona. O polo menos consíguenlo los bonos llibros a les persones que son sensibles a la influyencia de les lletres sobre fondu blancu.
Entiendo la lliteratura como esllumamientu; esllumamientu del llector y del personaxe lliterariu qu’hai tres cada obra, tamién la poética. Les contradicciones del mundu y de la condición humana rescamplen na estaya lliteraria p’aguiyar la intelixencia per siendes desconocíes. Esti saltu esixe contar un viaxe, de xeitu que tou poema o narración atópase en La Odisea. Hai un viaxe interior o exterior qu’implica un cambiu d’asitiamientu vital, xeográficu, sentimental. La lliteratura ye un turismu de sillón, anque tamién en sielles, en suelu, nuna cama, n'otru país se pue lleer.
Na bona ficción descubrimos la realidá d’ún mesmu, esa verdá suxetiva que torna oxetiva sobre’l papel al traviés de la mentira. Fernando Savater escribió cuantayá que contar la verdá ye contar de verdá, esto ye, inventar. Una historia que paga la pena contar ye un inventu de la realidá (o d’una realidá determinada y personal) y amuesa entós una forma de verdá sobre’l ser humanu.

 
Lleer un llibru, si s'elixe con aciertu estéticu más que gastronómicu, pue convertise nuna esperiencia trescendental pol viaxe cásique místicu que propón toa bona llectura. Frente a la marquetería de dellos escritores, prefiero la utilidá del moblame antiguu de casa, prácticu, resistente al tiempu. Tengo observao que los esperimentos lliterarios, como los yogures, ufiertan una caducidá más cercana cuanto mayor ye'l vacíu del so pensamientu. Intentar anubrir el silenciu col baturiciu de los fueos artificiales y les retóriques de sustantivos abstractos fai restallar inda más l'ausencia d'intelixencia (que non d'habilidá) en bien d'estos artefactos lliterarios que llamen posmodernos.
Con too lo anterior nun toi diciendo que sía enemigu de les novedaes, los riesgos o l'atrevimientu. Al aviesu, el méritu fundamental de munchos autores ye esi abandonu a lo desconocío, qu'envolubra al llector tamién nuna anovación temática o formal. Ando pensando, sobre too, na nueva narrativa norteamericana (que yá nun ye tan nueva) onde coluxen Dave Eggers, Jonathan Lethem, Chuck Palahniuk o'l desapaecíu David Foster Wallace. Nesto, como en too, lo malo son los imitadores, que queden na superficie, epidérmicos, insuficientes, valeros.
A la fin, la lliteratura consiste, más qu’otro, n’agrandar l’altor moral de les persones. Pa ser yo tengo que construyime y destruyime, pa volver construyime definitivamente. La maduración d'un ser humanu, aquello qu'atropa precisamente la lliteratura na so esencia, implica destruyime pa reconstruyime y ser obra de mio, ser yo. El primer yo ye un yo necesariu, mecánicu, frutu de la voluntá d'otros: de los padres. El yo definitivu, fíu del yo antiguu, ye por embargu un yo más xabaz, liberador, propiu, consecuente y fíu de la destrucción. Na medida d'esi últimu yo, la lliteratura sirve pa remocicar les causes y les consecuencies de los actos de cada persona. O polo menos, de los que lleen. Los que nun lleen establecerán los sos criterios d'alcuerdu con otres coordenaes, nun sé si meyores o peores, pero menos maraviyoses.

Bookmark the permalink. RSS feed for this post.

Leave a Reply

Search

Swedish Greys - a WordPress theme from Nordic Themepark. Converted by LiteThemes.com.